Kanlungan II

Hindi na nakabalik si Candice. Nabiktima siya ng rape/slay sa London. Isang Brit (bakit kasi nagbiro pa ako?) na lalaki ang nakakita sa kanya sa airport at hindi na siya tinantanan mula doon.

Sinundan pala siya ng lalaki hanggang sa hotel room niya at doon ginawa ang krimen.

Hindi ako makasunod. Ayaw kong makita ang kalunos lunos na sinapit ni Candice. Wala akong ginawa kundi magkulong sa kuwarto at uminom at sisihin ang sarili ko. Dahil sa nakita sa akin ng aking mga magulang, sila na ang nag-asikaso sa bangkay ni Candice katulong ang mga magulang niya.

Dahil walang available na visa ang parents ni Candice, ang aking mga magulang ang susundo sana kay Candice. Doon nangyari ang isa pang aksidente.

Pagkadating sa airport, pinacremate na agad ng parents niya si Candice. Ayaw na nilang pagusapan pa ang masamang nangyari sa anak.

Makaraan ang isang linggo, lulan na ako ng Land Rover ko papuntang San Rafael bitbit ang isang maletang gamit. Ayoko nang mamalagi sa Maynila.

*********

"Sir, medyo madumi lang po ang bahay dahil noong isang linggo pa naglinis ang katiwala. Pero maayos naman po lahat at walang nabubulok.

"Salamat ho. Tamang tama po sa akin ang lugar na ito. Gitna ng bundok at dagat."

"Eh sir, magkano po ba ang tawad nyo?"

"3 Million ba kamo 'to?"

"May tawad pa naman po."

"Ok na ako. Kung makatawad ka, sa'yo na lang 'yun".

"Naku! Maraming salamat po, sir! Pwede po bang magtanong?"

"Oo naman."

"Artist ho ba kayo? Usually ho kasi, mga pintor ang tumitingin dito dahil sa magandang tanawin at tahimik na lugar."

"Hindi po. Web designer po ako."

************

Simple lang ang bahay. Dalawang palapag, tatlong kuwarto sa taas, dalawang kuwarto sa baba. May kanya kanyang toilet and bath ang bawat kuwarto.

Ang isa sa ikinagusto ko sa bahay ay ang malaking kusina. Moderno pero native ang style. May malaking narra na dining table na pang labindalawang katao.

Kumpleto na din sa modernong gamit kaya umabot ng 3 million ang presyo. 20 cubic feet na refrigerator, tatlong 42" na LCD TV, isang King-size bed, dalawang Queen-size bed sa dalawang kuwarto, dalawang single bed sa dalawang kuwarto, kumpletong dining set, pinakamalaking washing machine na nakita ko sa buhay ko, at higit sa lahat, isang Macbook Air.

Iniwan na ang gamit ng dating may-ari na isa ring Congressman na natalo sa nakaraang election. Nangibang bansa na dahil sa hiya. Bakit? Limang daan lang ang boto sa mahigit limampung libong botante ng distrito.

Gumawa ako ng pineapple juice at naglagi sa veranda. Nasa gilid ng bahay ang veranda. Nasa kaliwa ko ang bundok, sa kanan ang dagat. At nasa baba ko ang isang dalagita.

*********

"Ineng! Anong ginagawa mo diyan? Halika!"

Ngumiti lang ang dalagita sabay takbo sa likod ng puno ng niyog.

"Ineng! Halika! Huwag kang matakot", sabay baba ko sa unang palapag ng bahay.

Nandoon pa din ang dalagita. Parang may itinatago sa likod.

"Halika. Ako si Anton. Anong pangalan mo?"

Sa halip na sumagot, lumapit na siya sa akin. Nahalata kong basket ang nasa likod niya. Iniabot niya ang basket sa akin na may lamang iba't ibang prutas.

"O, para kanino 'ito?"

"Para po sa inyo. Pasalubong po ni Kapitan."

"Ay, pakisabi salamat."

Lalayo na sana ang dalagita pagka-abot ng basket pero tinawag ko ito.

"Ineng! Anong pangalan mo?"

"Dida po."

"Dida?"

"Candida".

***********